मध्यपूर्वमा जारी तनावबीच इरानले संयुक्त अरब इमिरेट्स (युएई) का महत्त्वपूर्ण पूर्वाधारहरूमा ड्रोन आक्रमण गरेको छ। युएईको सबैभन्दा ठूलो बन्दरगाह र तेल भण्डारण केन्द्र मानिने फुजैराह तथा दुबई अन्तर्राष्ट्रिय विमानस्थल नजिक ड्रोन आक्रमण भएपछि केही समयका लागि उडान सेवा अवरुद्ध भएको बताइएको छ। विमानस्थल नजिक ड्रोनसँग सम्बन्धित घटनापछि आगलागी भएको थियो, जसका कारण केही उडान ढिला भए भने केही रद्द गर्नुपरेको थियो।
यसैबीच रणनीतिक रूपमा महत्वपूर्ण फुजैराह बन्दरगाह र औद्योगिक क्षेत्रमा ड्रोन आक्रमण भएपछि आगलागी भएको थियो। उक्त बन्दरगाह क्षेत्र खाडी क्षेत्रकै ठूलो तेल भण्डारण केन्द्रमध्ये एक मानिन्छ। आक्रमणपछि क्षतिको मूल्याङ्कन गर्न बन्दरगाहमा केही समय तेल लोड गर्ने काम रोकिएको थियो।
यसका साथै अबु धाबी नजिकको अल बहिया क्षेत्रमा कारमाथि रकेट आक्रमण हुँदा एक प्यालेस्टिनी नागरिकको मृत्यु भएको स्थानीय अधिकारीहरूले जनाएका छन्। युएईको रक्षा मन्त्रालयका अनुसार सोमबार मात्र वायु प्रतिरक्षा प्रणालीले छ वटा ब्यालिस्टिक क्षेप्यास्त्र र २१ वटा ड्रोनलाई अवरोध गरेको थियो। अमेरिका, इजरायल र इरानबीच सुरु भएको युद्धपछि इरानले युएईतर्फ एक हजार नौ सयभन्दा बढी क्षेप्यास्त्र र ड्रोन प्रहार गरिसकेको बताइएको छ।
फुजैराह बन्दरगाह ओमानको खाडी किनारमा अवस्थित भएकाले त्यहाँ पुग्न जहाजहरूले होर्मुज जलडमरूमध्य पार गर्न आवश्यक पर्दैन। यस कारण उक्त बन्दरगाह अन्तर्राष्ट्रिय ऊर्जा आपूर्तिमा महत्वपूर्ण मानिन्छ। विश्लेषकहरूका अनुसार यदि होर्मुज जलडमरूमध्य अवरुद्ध भए पनि युएईले पाइपलाइनमार्फत अबु धाबीका तेल क्षेत्रबाट तेल फुजैराहमार्फत निर्यात गर्न सक्छ।
विशेषज्ञहरूले यस आक्रमणले खाडी क्षेत्रको ऊर्जा पूर्वाधार कति संवेदनशील छ भन्ने देखाएको बताएका छन्। यद्यपि आक्रमणपछि पनि दुबईको व्यापारिक गतिविधि भने सामान्य रूपमा चलिरहेको बताइएको छ। युएई सरकारले देशको अर्थतन्त्र बलियो रहेको र संकटबाट चाँडै उकासिने विश्वास व्यक्त गरेको छ।
