अमेरिका
अमेरिकी सुरक्षा निकायका एक अनलाइन अनुसन्धानकर्ताले डार्क वेबमा फैलाइएको तस्बिरमा देखिएको सानो संकेतका आधारमा वर्षौँदेखि यौन शोषणमा परेकी एक बालिकाको उद्धार गर्न सफल भएका छन्।
अमेरिकी होमल्याण्ड सेक्युरिटी इन्भेस्टिगेसन्स (HSI) का विशेषज्ञ अनुसन्धानकर्ता ग्रेग स्क्वायर र उनको टोलीले “लुसी” नाम दिइएकी १२ वर्षीया बालिकाको पहिचान खोज्ने क्रममा लामो समयसम्म कुनै ठोस प्रमाण पाउन सकेका थिएनन्। डार्क वेबमा अपलोड गरिएका तस्बिरहरूमा अपराधीले पहिचान खुल्ने सबै संकेत हटाउने प्रयास गरेको थियो।
अनुसन्धान टोलीले तस्बिरमा देखिएका बत्तीका सॉकेट, ओछ्यान, खेलौना र फर्निचरको अध्ययन गर्दै बालिका उत्तर अमेरिकामै रहेको अनुमान गरे। पछि कोठामा देखिएको सोफा सीमित क्षेत्रमा मात्र बिक्री हुने प्रकारको भएको पत्ता लागेपछि अनुसन्धानको दायरा घट्यो, तर अझै हजारौँ सम्भावित ठेगाना बाँकी थिए।
निर्णायक मोड तब आयो जब टोलीले बालिकाको शयनकक्षको इँटाको भित्तामा ध्यान दियो। इँटा विशेषज्ञको सहयोगमा उक्त इँटा “फ्लेमिङ अलामो” नामको विशेष प्रकारको भएको पहिचान गरियो, जुन सन् १९६०–८० को दशकमा अमेरिकाको दक्षिण–पश्चिम क्षेत्रमा मात्र उत्पादन हुन्थ्यो। इँटा धेरै भारी हुने भएकाले टाढासम्म ढुवानी नहुने जानकारीपछि अनुसन्धान टोलीले सम्भावित स्थान निकै सानो क्षेत्रमा सीमित गर्न सफल भयो।
त्यसपछि सामाजिक सञ्जाल र अभिलेखको अध्ययन गर्दै टोलीले एक घर पहिचान गर्यो, जहाँ बालिका आफ्नी आमाको प्रेमीसँग बसिरहेको पत्ता लाग्यो। उक्त व्यक्ति पहिले नै यौन अपराधमा दोषी ठहर भइसकेका थिए। सुरक्षाकर्मीहरूले छापा मारेर उनलाई पक्राउ गरे र उनले छ वर्षसम्म बालिकामाथि बलात्कार गरेको खुल्यो। पछि उनलाई ७० वर्षभन्दा बढी कैद सजाय सुनाइयो।
वर्षौँपछि भेट हुँदा अहिले वयस्क बनेकी लुसीले आफू उद्धारको लागि निरन्तर प्रार्थना गरिरहेको बताएकी छन्। अनुसन्धानकर्ता स्क्वायरले यस्तो काम मानसिक रूपमा अत्यन्त कठिन भए पनि बालबालिकालाई बचाउन पाउँदा गर्व महसुस हुने बताएका छन्।
