काठमाडौँ,
प्रमुख प्रतिपक्षी दल नेपाली कांग्रेसले प्रतिनिधिसभाको पहिलो अधिवेशनको तयारीका लागि संसदीय दलको बैठक आह्वान गरेको छ। सांसद मोहन आचार्यका अनुसार, सिंहदरबारस्थित कांग्रेसको केन्द्रीय कार्यालयमा आज बिहान ११ बजे बैठक बस्नेछ।
बैठकको मुख्य एजेन्डा नयाँ प्रतिनिधिसभाको पहिलो बैठकमा पार्टीले कसरी उपस्थित हुने र आफ्नो भूमिका कसरी प्रस्तुत गर्ने भन्ने रणनीति बनाउनु रहेको सांसद आचार्यले बताए। “पहिलो बैठकमा पार्टीको भूमिका स्पष्ट गर्ने उद्देश्यले यो बैठक बोलाइएको हो,” उनले भने।
फागुन २१ गते सम्पन्न प्रतिनिधिसभा निर्वाचनपछि गठन भएको नयाँ प्रतिनिधिसभाको पहिलो बैठक दिउँसो २ बजे सिंहदरबारस्थित निर्माणाधीन सङ्घीय संसद् भवनको बहुउद्देश्यीय कक्षमा बस्दैछ। यसलाई ध्यानमा राख्दै कांग्रेसले आन्तरिक तयारी तीव्र बनाएको छ।
साथै, अधिवेशनको प्रारम्भमा पार्टीका शीर्ष नेताले सम्बोधन गर्ने कार्यक्रम तय भएकाले संसदीय दलको बैठकमा पार्टीको धारणा र प्रस्तुति तय गर्नु महत्वपूर्ण हुने बताइएको छ।
