काठमाडौँ,
इरानका गुप्तचर मन्त्री इस्माइल खातिब हवाई आक्रमणमा मारिएको इरानी राष्ट्रपति मसुद पेजेशकियन ले पुष्टि गरेका छन्। उनले उक्त घटनालाई “कायरतापूर्ण हत्या” भन्दै देश गहिरो शोकमा डुबेको बताएका छन्।
इजरायल ले बुधबार तेहरानमा गरेको हवाई आक्रमणमा खातिब मारिएको दाबी गरेको छ। यसअघि पनि इजरायलले इरानका उच्च सुरक्षा अधिकारी अली लारिजानी र बसीज अर्धसैनिक बलका प्रमुख गोलामरेजा सोलेमानी लाई मारिएको जनाएको थियो।
यो घटनाक्रम अयातोल्लाह अली खामेनेई को हत्या पछि सुरु भएको द्वन्द्वको क्रममा भएको हो, जहाँ इजरायल र संयुक्त राज्य अमेरिका ले इरानको नेतृत्व कमजोर पार्ने प्रयासस्वरूप लगातार आक्रमण गर्दै आएका छन्।
इरानले यस घटनाको प्रतिशोध लिने चेतावनी दिएको छ। पछिल्ला आक्रमण र प्रतिआक्रमणका कारण मध्यपूर्वका विभिन्न देशहरूमा तनाव फैलिएको छ। इरानले विभिन्न क्षेत्रमा आक्रमण गर्दा इजरायलमा दुई जनाको मृत्यु भएको तथा दुबई, कतार, कुवेत, इराक, बहराइन र साउदी अरेबियामा विस्फोट तथा ड्रोन अवरोधका घटनाहरू रिपोर्ट भएका छन्।
युद्ध सुरु भएयता इजरायल र अमेरिकी आक्रमणमा इरानमा १,३०० भन्दा बढी मानिसको मृत्यु भएको सरकारी तथ्यांक छ, जसमा महिला र बालबालिका समेत रहेका छन्। अन्य स्वतन्त्र स्रोतहरूले भने मृतक संख्या अझ बढी रहेको जनाएका छन्।
यसबीच, युद्धको असर विश्वव्यापी रूपमा देखिएको छ। ऊर्जा आपूर्तिको प्रमुख मार्ग मानिने हर्मुज जलडमरूमध्य प्रभावित हुँदा अन्तर्राष्ट्रिय बजारमा तेलको मूल्य तीव्र रूपमा बढेको छ।
