काठमाडौँ,
प्रधानमन्त्री सुशीला कार्कीले हालै सम्पन्न निर्वाचनलाई सफल बनाउन महत्त्वपूर्ण भूमिका खेलेका सुरक्षा निकायका पदाधिकारी, कर्मचारी तथा सम्पूर्ण मतदाताप्रति धन्यवाद व्यक्त गर्नुभएको छ।
मधेस प्रदेशको राजधानी जनकपुरमा आयोजित कार्यक्रममा प्रधानमन्त्री कार्कीले कठिन र चुनौतीपूर्ण परिस्थितिमा पनि निर्वाचन शान्तिपूर्ण, निष्पक्ष र व्यवस्थित रूपमा सम्पन्न गर्न विभिन्न तहमा खटिएका सुरक्षा अधिकारी, प्रशासनिक कर्मचारी र सरोकार भएका निकायको योगदानको उच्च प्रशंसा गर्नुभएको थियो। यस बारे प्रधानमन्त्रीका प्रेस सल्लाहकार रामबहादुर रावलले जानकारी दिनुभयो।
प्रधानमन्त्री कार्कीले प्रदेश–प्रदेशमा रहेका सुरक्षा निकायका प्रमुख तथा निर्वाचन व्यवस्थापनमा संलग्न अधिकारीहरूलाई बधाई दिँदै उहाँहरूको समर्पण र जिम्मेवारीप्रति कृतज्ञता व्यक्त गर्नुभयो। उहाँले भन्नुभयो, “हामीले बनाएको योजना तपाईंहरूले उत्कृष्ट रूपमा कार्यान्वयन गर्नुभयो। हामीले लिएको सङ्कल्पलाई तपाईंहरूले सफलतापूर्वक पूरा गरिदिनुभयो। यसका लागि म आभारी छु। मान्छेहरू मलाई बधाइ भनिरहेका छन्, यसको वास्तविक हकदार तपाईंहरू हो।”
त्यस अवसरमा सुरक्षा निकायका अधिकारीहरूले पनि यस्तो महत्त्वपूर्ण राष्ट्रिय अनुष्ठानको हिस्सा बन्न पाएकोमा खुसी व्यक्त गर्दै प्रधानमन्त्री कार्की जस्तो नेतृत्वसँग काम गर्न पाउनु गर्वको विषय भएको बताउनुभयो। उहाँहरूले निर्वाचनको क्रममा देखेका अनुभवहरू पनि साझा गर्नुभयो।
